Mshambulizi Erling Haaland alifunga mabao mawili huku Manchester City ikiipa pigo jingine Manchester United ya kocha Ruben Amorim kwa ushindi wa 3-0 katika mechi ya Ligi Kuu Jumapili.

Kiungo wa Uingereza Phil Foden alifungua ukurasa wa mabao kabla Haaland hajachukua usukani kipindi cha pili kwa mabao mawili, licha ya kukosa nafasi ya ajabu katikati ya magoli hayo, huku City ikirejea kwenye ushindani baada ya kupoteza michezo miwili mfululizo ya ligi.

United waliingia kwenye derby wakiwa juu ya City kwenye msimamo kwa mara ya kwanza baada ya miaka mitano. Hata hivyo, hilo lilitokana zaidi na udhaifu wa City mwanzoni mwa msimu kuliko maendeleo ya kikosi cha Amorim, ambacho kimekusanya alama nne pekee katika mechi nne za kwanza na kutolewa kwenye Carabao Cup na Grimsby ya daraja la nne.

Kipa mpya Gianluigi Donnarumma alihitimisha onyesho bora la City kwa kuokoa shuti kali la Bryan Mbeumo na kuwanyima United nafasi ya kurejea mchezoni wakiwa nyuma 2-0.

City wamesalia nyuma kwa pointi sita dhidi ya vinara Liverpool, lakini ushindi huu unawapa morali kubwa kabla ya michezo migumu dhidi ya mabingwa wa Serie A Napoli na wapinzani wa ubingwa wa EPL Arsenal wiki ijayo.

Kabla ya mechi, mashabiki wote waliweka kando uhasama na kumpa heshima bingwa wa ndondi Ricky Hatton, shabiki mkubwa wa City, aliyefariki Jumapili akiwa na miaka 46. Uso wake ulionyeshwa kwenye skrini kubwa wakati wa dakika moja ya makofi.

Foden, ambaye pia ni shabiki wa utotoni wa City, alisema habari hizo ziliwapa wachezaji motisha ya ziada kushinda kwa heshima ya Hatton. Na kweli, Mwingereza huyo alikuwa mhimili wa ushindi muhimu baada ya kuanza msimu vibaya.

Mchezaji huyo bora wa EPL msimu wa 2023/24 alikuwa akipitia wakati mgumu msimu uliopita, akipoteza kiwango chake. Masuala ya kiafya yalimsababisha kutoanza mechi yoyote msimu huu hadi Jumapili, lakini alichukua dakika 18 pekee kuonyesha makali yake.

Ulinzi wa United uliporuhusu Jeremy Doku kupenya na kutoa krosi iliyo mkuta Foden akiwa hana ulinzi, naye akafunga kwa kichwa.

Kocha Amorim aliamua kuendelea kumpa nafasi kipa Altay Bayindir badala ya sajili mpya Senne Lammens, lakini haikusaidia.

⏤ Donnarumma waamua ⏤

Tijjani Reijnders alifyatua shuti moja kwa moja kwa Bayindir badala ya kuipa City bao la pili mapema, lakini Doku alihusika tena dakika ya 53 wakati Haaland alipoonyesha nguvu, kasi na umakini kwa kumchungulia Bayindir na kufunga bao la pili.

Haaland alipoteza nafasi rahisi muda mfupi baadaye baada ya kupokea pasi nzuri kufuatia makosa ya Matthijs de Ligt. Akiwa amemzunguka Bayindir, aligonga mwamba badala ya kufunga.

Muda mfupi baadaye, Donnarumma aliokoa kwa kishindo shuti la Mbeumo lililokuwa linaelekea kona ya chini, jambo lililozuia United kurejea mchezoni.

Badala ya 2-1, matokeo yakawa 3-0 baada ya Harry Maguire kumpoteza mpira kwa urahisi na Bernardo Silva kumpasia Haaland, ambaye alikimbia nusu uwanja wa United na kufunga kwa utulivu.

Hilo lilikuwa bao lake la nane katika mechi tisa dhidi ya United.

Reijnders alikosa kuongeza maumivu ya United baada ya kupiga nje akiwa na nafasi nzuri ya uso kwa uso na Bayindir.

Mashabiki wa City walimshangilia Amorim kwa nyimbo za “Sacked in the morning” (anafutwa asubuhi).

Ingawa haipo hatarini kufutwa mara moja, rekodi ya Amorim kwenye EPL sasa ni mbaya: ushindi 8 pekee katika mechi 31