News
Dkt Amoth: Asilimia 80 ya wakenya wanaishi na magonjwa ya Meno
Mkurugenzi wa Afya nchini Dkt Patrick Amoth amesema asilimia 80 ya wakenya wanaishi na magonjwa ya Meno kutokana na kukosa kuzingatia afya ya meno kikamilifu.
Dkt Amoth alitaja uvutaji wa sigara na utumizi wa vyakula vya sukari kupita kiasi kama sababu kuu ya magonjwa ya meno.
Akizungumza na Wanahabari baada ya kufungua rasmi Kongamano la kujadili changamoto za afya ya meno katika eneo la Diani kaunti ya Kwale, Dkt Amoth alisema mikakati ya kuhakikisha magonjwa ya Meno yanajumuishwa katika bima ya afya ya SHA imeafikiwa.
“Tumekuja hapa kutafakari mbinu gani zitasaidia kukabiliana na changamoto ambazo zipo kwani idadi kubwa ya wakenya wanakabiliana na tatizo la meno na hii imechangia sana na kutozingatia afya ya meno”, alisema Dkt Amoth.
Kwa upande wake rais wa Muungano wa madaktari wa meno nchini Dkt Kahura Mundia alisema Kenya inakabiliwa na changamoto ya uhaba wa madaktari wa meno, akiitaka serikali kuhakikisha inajiri madaktari wa meno wa kutosha.
Taarifa ya Mwahoka Mtsumi
Maafisa wa Polisi kaunti ya Mombasa wanachunguza tukio la wizi dhidi ya mtalii wa kigeni lililotokea katika eneo la Nyali
Kulingana na ripoti ya maafisa wa polisi, mtalii huyo mwenye umri wa miaka 51 ambaye ni raia wa Marekani, anadai kulaghaiwa na kisha kushambuliwa na kundi la wanaume aliyokutana nao muda mfupi kabla ya tukio.
Ripoti hiyo imeeleza kwamba mnamo mwezi Aprili 9 mwaka huu, raia huyo wa kigeni akiwa katika mkahawa mmoja eneo la Nyali jijini Mombasa, alikutana na mwanaume aliyejitambulisha kama Alex, ambaye alimshawishi kuelekea katika nyumba ya Airbnb iliyoko karibu na mkahawa huo.
Taarifa hiyo ilifafanua zaidi kwamba alipofika katika chumba hicho, alikumbana na wanaume wengine watano waliokuwa wakimsubiri ambapo mlango ulifungwa na kisha akashambuliwa na kulazimishwa kutoa pesa na vitu vya thamani.
Wahalifu hao walitoroka na mali mbalimbali ikiwemo simu ya rununu, kompyuta mpakato (laptop), fedha taslimu pamoja na fedha za kigeni na pia walifanikiwa kutoa pesa kutoka kwenye kadi zake za benki kwa njia ya udanganyifu.
Maafisa wa polisi kutoka Bamburi kwa kushirikiana na maafisa wa upelelezi wa DCI Nyali walifika eneo la tukio na kuanza uchunguzi, ingawa hadi sasa hakuna mtu aliyekamatwa wala mali iliyopatikana.
Kesi hiyo imewekwa chini ya uchunguzi zaidi huku juhudi zikiendelea kuwabaini na kuwakamata wahusika wa tukio hilo.
Taarifa ya Mwanahabari wetu
Idara ya usalama eneo la Likoni kaunti ya Mombasa imesema inachunguza kifo cha mwanamke mmoja aliyefariki katika mtaa wa senti kumi.
Mkuu wa polisi wa Likoni Joseph Mutungi alisema mwanamke huyo anadaiwa kupoteza maisha wakati wakiwa nyumbani kwa mwanamme anayesemekana kuwa mchumba wake.
Taarifa za awali ziliarifu kuwa marehemu alikuwa mgonjwa na anadaiwa alifika hospitalini kusaka matibabu japo hakupata huduma na kurejea nyumbani bila kutibiwa.
Inasemekana baadaye mchumba wake alioondoka kwenda kazini na kumwacha chini ya uangalizi wa mwanamke mwengine katika ploti hiyo.
Hali yake inadaiwa kuzorota na hatimaye kuaga dunia.
Maafisa wa usalama walisema wanaendelea na uchunguzi kubaini chanzo cha kifo hicho.
Mwili wa marehemu unahifadhiwa katika chumba cha kuhifadhi maiti katika hospitali ya Coast general kwa uchunguzi zaidi.
Taarifa ya Mwanahabari wetu
Polisi wanachunguza tukio la wizi dhidi ya raia wa kigeni
Polisi eneo la Likoni-Mombasa inachunguza kifo cha mwanamke
