Sports
Peres Jepchirchir wa Kenya Aibuka Bingwa wa Mbio za Marathoni Dunia Tokyo
Mkenya Peres Jepchirchir alitimka kishujaa katika mwisho wa mita 100 kwa kasi ya juu, akimshinda Tigst Assefa wa Ethiopia na kutwaa dhahabu katika marathoni ya wanawake kwenye mashindano ya dunia mjini Tokyo Jumapili.
Wawili hao walikuwa bega kwa bega walipoingia katika Uwanja wa Kitaifa baada ya kukimbia kilomita 41 mitaani mwa Tokyo, wakiongeza kasi kila wakati.
Jepchirchir, akiwa na uchovu usoni, alijaribu kujiondoa, lakini Assefa aliyekuwa mmiliki wa rekodi ya dunia alionekana kushika kasi katika mstari wa nyuma. Hata hivyo, katika mstari wa mwisho kuelekea kumalizia mbio, Mkenya huyo mwenye umri wa miaka 31 alipata nguvu za ziada na kumbwaga mpinzani wake kutoka Ethiopia kwa ushindi wa dhahabu uliopatikana kwa taabu.
Jepchirchir, ambaye pia ni bingwa wa Olimpiki katika uwanja huohuo wakati wa michezo ya Tokyo 2021 iliyocheleweshwa na janga la Covid, alimaliza kwa muda wa saa 2:24:43, akimshinda Assefa mshindi mara mbili wa marathoni ya Berlin na aliyeshinda London mapema mwaka huu kwa muda bora wa dunia wa 2:15:50 –kwa sekunde mbili tu.
“Nimefurahi sana kwa kile nilichofanikisha Tokyo,” Jepchirchir alisema kwa tabasamu. “Ilikuwa joto sana, ngumu sana, lakini niliweza. Haikuwa rahisi. Nilipoingia uwanjani, nilipata nguvu nyingi kutoka kwa mashabiki. Sikutegemea kushinda. Sikuwa na mpango wa kufanya mwendo wa mwisho, lakini nilipoona nimebakia na mita 100, nilianza tu kuongeza kasi. Nikapata nguvu zilizokuwa zimejificha.”
Akaongeza: “Licha ya kukimbia marathoni nyingi katika maisha yangu, naishukuru sana hii kwa sababu sikutegemea ushindi. Haya ndiyo mashindano yangu ya kwanza ya dunia na nashukuru yametokea Tokyo kwa sababu nilipata dhahabu yangu ya kwanza ya marathoni nchini Japani kwenye Olimpiki. Hii ilikuwa ngumu zaidi kwa sababu unyevunyevu ulikuwa juu sana na sikujua ingekuwa joto kiasi hicho. Bado nina safari ndefu ya kwenda. Nitafanya kazi kwa bidii zaidi. Ushindi huu unanifanya nijiamini zaidi na zaidi.”
Kwa upande wa Assefa, ilikuwa hali ya kurudia historia ya maumivu, baada ya pia kushushwa hadi namba mbili kwenye Olimpiki za Paris mwaka jana aliposhindwa na Mholanzi Sifan Hassan.
Hassan hakushiriki mashindano haya ya dunia, akichagua badala yake kukimbia Marathoni ya Sydney huku akielekeza nguvu zake kwenye mashindano ya World Marathon Majors.
Sports
Klabu ya Arsenal guu moja kuingia hatua ya Nusu fainali Klabu bingwa baada ya ushindi dhidi ya Sporting
Mshambuliaji Kai Havertz aliifungia Arsenal F.C. bao la ushindi katika dakika za mwisho kabisa, na kuisaidia timu hiyo kuibuka na ushindi mwembamba wa 1-0 dhidi ya Sporting CP katika mechi ya mkondo wa kwanza wa robo fainali ya UEFA Champions League iliyochezwa Jana usiku.
Kikosi cha kocha Mikel Arteta kilifika katika Uwanja wa Estadio Jose Alvalade kikiwa kimeathiriwa na vipigo viwili mfululizo dhidi ya Manchester City F.C. kwenye fainali ya Kombe la Ligi na Southampton F.C. katika robo fainali ya Kombe la FA.
Kwa mara nyingine, Arsenal haikucheza kwa kiwango chake bora, lakini ilifanikiwa kupata ushindi kutokana na uokoaji mzuri wa kipa David Raya pamoja na umakini wa Havertz aliyefunga bao la ushindi katika muda wa nyongeza.
Arsenal sasa ina nafasi kubwa ya kufuzu nusu fainali kabla ya mechi ya marudiano itakayochezwa kaskazini mwa London tarehe 15 Aprili, ingawa italazimika kuboresha kiwango chake ikiwa inataka kushinda taji hilo kwa mara ya kwanza.
Vipigo dhidi ya City na Southampton vilikuwa mara ya kwanza msimu huu kwa Arsenal kupoteza mechi mbili mfululizo, huku kipigo cha Kombe la FA kikiwa cha tano kwao msimu huu.
Athari za matokeo hayo bado zilionekana Lisbon, ambapo Arsenal ilipata ugumu wa kucheza kwa mwendelezo mzuri, lakini kama ilivyokuwa mara kadhaa msimu huu, walipata njia ya kushinda licha ya kutocheza vizuri.
katika mechi nyingine hatua ya robo fainali ni kwamba Bayern Munich waliondoka na ushindi wa magoli 2-1 mikononi mwa Real Madrid katika uwanja wao wa nyumbani Estadio Santiago Bernabeu.
Magoli ya Bayern yakitiwa kimyani na mshmabulizi Luis kipindi cha kwanza naye Erling Haaland kipindi cha pili.
Mechi ya marudiano itachezwa juma lijalo April 15.
Sports
Wakili George Kithi akabidhiwa rasmi Cheti cha uenyekiti wa bodi ya Michezo marufu kama Sports Arts and Social Development Fund (SASDF)
Waziri wa Wizara ya Masuala ya Vijana, Uchumi bunifu na Michezo, Salim Mvurya, ameshudia hafla rasmi ya kukabidhiwa uenyekiti wa Bodi ya Sports, Arts and Social Development Fund (SASDF) kutoka kwa Luteni Jenerali Mstaafu Jackson Tuwei kwenda kwa Mheshimiwa wakili George Kithi. Hafla hiyo ilifanyika, jijini Nairobi hii leo.
Akizungumza wakati wa hafla hiyo, Waziri Mvurya alimpongeza Luteni Jenerali (Mstaafu) Tuwei kwa uongozi wake wa mfano na kujitolea kwake katika kipindi chake cha utumishi. Alibainisha kuwa chini ya uongozi wake, bodi hio iliimarika na kuwa taasisi imara na yenye mwitikio zaidi katika kusaidia na kuendeleza vipaji vya Wakenya.
Aidha, Waziri alieleza imani yake kwa uongozi wa Mheshimiwa wakili George Kithi, akimhakikishia ushirikiano na msaada kamili kutoka kwa Wizara katika kutekeleza majukumu ya Bodi kwa kipindi chake cha miaka mitatu.
SASDF inaendelea kuwa nguzo muhimu katika kulea na kukuza vipaji vya Kenya, pamoja na kuimarisha hadhi ya nchi kimataifa kupitia michezo na uchumi wa ubunifu. Kupitia uwezeshaji wa wanamichezo, wasanii na wadau wa utamaduni, mfuko huo unachangia pakubwa katika ukuaji wa sekta za michezo na ubunifu nchini.
Polisi wanachunguza tukio la wizi dhidi ya raia wa kigeni
Polisi eneo la Likoni-Mombasa inachunguza kifo cha mwanamke
