Sports
Kikosi cha Voliboli Chipukizi Junior Wafalme Stars watinga Nusu Fainali Mashindano ya Bara Afrika
Timu ya taifa ya mpira wa voliboli ya vijana chini ya miaka 20, Junior Wafalme Stars, imefuzu kwa nusu fainali ya Mashindano ya Mataifa ya Afrika baada ya kuibuka na ushindi wa seti 3-1 dhidi ya Algeria katika robo fainali ya kusisimua iliyochezwa katika ukumbi wa ndani wa Hassan Mostafa mjini Giza, Misri, Alhamisi.
Kikosi kinachoongozwa na Luke Makuto kilianza kwa kusuasua, kikisalimu amri kwa Waafrika wa Kaskazini kwa seti ya kwanza 25-21, kabla ya kurejea kwa nguvu na kushinda seti ya pili na ya tatu 25-22 na 25-17 mtawalia.
Seti ya nne ilishuhudia Junior Wafalme Stars wakipambana kwa nguvu na kushinda 26-24, baada ya Waalgeria kulazimisha mchezo uendelee kwa matumaini ya kuipiku Kenya na kulazimisha seti ya maamuzi, juhudi ambazo ziligonga mwamba.
“Mchezo ulikuwa mgumu lakini ninafurahi vijana walipambana vikali na kushinda. Algeria pia ni timu nzuri na wametupa upinzani mkubwa,” alisema Njine.
Bethwel Kiplagat, aliyekuwa Mchezaji Bora Zaidi (MVP) wakati wa michezo ya mashule ya Jumuiya ya Shule za Upili Afrika Mashariki (FEASSSA), aliibuka shujaa wa mchezo huu na hadi sasa ameiwezesha Kenya kupata jumla ya pointi 102 zikiwemo mashambulizi 89.
Mshambuliaji huyo wa Shule ya Upili ya Cheptil alionekana mwenye furaha kubwa baada ya kutunukiwa tuzo ya MVP na kusaidia Junior Wafalme Stars kutinga nusu fainali.
“Ninafurahia sana kwa mchezo wa leo, ulikuwa mgumu lakini tuliweza. Tuna imani tunapoingia katika mechi ya kesho na tuko tayari kutoa makali yetu yote,” alisema.
Kenya sasa itamenyana na wenyeji Misri kesho katika nusu fainali ya kusisimua, ambapo nafasi ya kufika fainali itakuwa tiketi ya kufuzu kwa Mashindano ya Dunia ya 2028.
Awali, mechi hizi zilitarajiwa kutoa tiketi kwa Mashindano ya Dunia ya 2026, lakini yamefutwa na Shirikisho la Kimataifa la Mpira wa Voliboli (FIVB) ili kupunguza msongamano wa mashindano.
Mjadala mkali umeibuka katika kipindi cha COCO Asubuhi baada ya Shuga Boy, shabiki wa Manchester United, kuweka dau zito na la kushangaza dhidi ya Main Man Rio ambaye ni shabiki wa Arsenal.
Akizungumza kwenye kipindi cha COCO Asubuhi, kinachoendeshwa na Tatu Sure—inayojumuisha Shuga Boy mwenyewe, Main Man Rio na Solomon Zully—Shuga Boy alifunguka, akidai kuwa Arsenal hawana uwezo wa kubeba hata kombe moja msimu huu licha ya matarajio makubwa kutoka kwa mashabiki wao.
Kwa mujibu wa Shuga Boy, mashabiki wa Arsenal wamekuwa wakijipa matumaini makubwa ya kutwaa hadi vikombe vinne, lakini hali halisi uwanjani haioneshi dalili hizo. Alienda mbali zaidi na kuweka dau la kipekee kwa Main Man Rio, ambaye ni shabiki mkubwa wa Arsenal.
“Nilimwambia Main Man Rio, wakibeba kombe nitampa gari yangu. Sasa naongeza dau—wakishinda kikombe msimu huu, nitampa gari yangu pamoja na dadangu,” alisema Shuga Boy kwa msisitizo, kauli iliyozua kicheko na mjadala mkali studio.
Kauli hiyo imekuja katika kipindi ambacho Arsenal wamekuwa wakionyesha ushindani mkubwa chini ya kocha Mikel Arteta, wakijijenga kama moja ya timu zinazowania ubingwa wa Premier League. Licha ya maendeleo hayo, ukosefu wa vikombe katika misimu mingi bado unawapa wapinzani wao nafasi ya kuwabeza.
Kwa upande mwingine, Manchester United nao wanapitia kipindi cha mabadiliko, wakijaribu kurejea kwenye ubora wao wa zamani waliouonyesha enzi za Sir Alex Ferguson. Licha ya changamoto, bado wana historia nzito ya mafanikio, jambo linalowapa mashabiki wao kujiamini wanapojadili soka la Uingereza.
Usiku wa leo, macho ya mashabiki yataelekezwa kwenye mchezo wa ligi kati ya Manchester United dhidi ya Leeds United—mchezo unaotarajiwa kuwa na ushindani mkali, huku Shuga Boy akitumaini timu yake itapata ushindi na kuendeleza presha kwa wapinzani wao.
Wakati mabishano yakiendelea mitandaoni na kwenye studio za redio, swali kubwa linabaki: Je, Arsenal wataweza kuwanyamazisha wakosoaji wao kwa kubeba angalau kombe moja msimu huu, au kauli ya Shuga Boy itageuka kuwa unabii?
Sports
Klabu ya Arsenal guu moja kuingia hatua ya Nusu fainali Klabu bingwa baada ya ushindi dhidi ya Sporting
Mshambuliaji Kai Havertz aliifungia Arsenal F.C. bao la ushindi katika dakika za mwisho kabisa, na kuisaidia timu hiyo kuibuka na ushindi mwembamba wa 1-0 dhidi ya Sporting CP katika mechi ya mkondo wa kwanza wa robo fainali ya UEFA Champions League iliyochezwa Jana usiku.
Kikosi cha kocha Mikel Arteta kilifika katika Uwanja wa Estadio Jose Alvalade kikiwa kimeathiriwa na vipigo viwili mfululizo dhidi ya Manchester City F.C. kwenye fainali ya Kombe la Ligi na Southampton F.C. katika robo fainali ya Kombe la FA.
Kwa mara nyingine, Arsenal haikucheza kwa kiwango chake bora, lakini ilifanikiwa kupata ushindi kutokana na uokoaji mzuri wa kipa David Raya pamoja na umakini wa Havertz aliyefunga bao la ushindi katika muda wa nyongeza.
Arsenal sasa ina nafasi kubwa ya kufuzu nusu fainali kabla ya mechi ya marudiano itakayochezwa kaskazini mwa London tarehe 15 Aprili, ingawa italazimika kuboresha kiwango chake ikiwa inataka kushinda taji hilo kwa mara ya kwanza.
Vipigo dhidi ya City na Southampton vilikuwa mara ya kwanza msimu huu kwa Arsenal kupoteza mechi mbili mfululizo, huku kipigo cha Kombe la FA kikiwa cha tano kwao msimu huu.
Athari za matokeo hayo bado zilionekana Lisbon, ambapo Arsenal ilipata ugumu wa kucheza kwa mwendelezo mzuri, lakini kama ilivyokuwa mara kadhaa msimu huu, walipata njia ya kushinda licha ya kutocheza vizuri.
katika mechi nyingine hatua ya robo fainali ni kwamba Bayern Munich waliondoka na ushindi wa magoli 2-1 mikononi mwa Real Madrid katika uwanja wao wa nyumbani Estadio Santiago Bernabeu.
Magoli ya Bayern yakitiwa kimyani na mshmabulizi Luis kipindi cha kwanza naye Erling Haaland kipindi cha pili.
Mechi ya marudiano itachezwa juma lijalo April 15.
Mpango wa uagizaji mafuta wa G to G waingia dosari
IEBC: Vijana wanaitisha pesa kusajiliwa kuwa wapiga kura
