News
Hospitali ya Rufaa ya kaunti ya Kilifi yafanikisha uzalishaji wa mapacha walioshikana
Hospitali ya Rufaa ya kaunti ya Kilifi imepata mafanikio ya kihistoria ya kitabibu baada ya kufanikisha uzalishaji watoto mapacha walioshikana kwa mara ya kwanza.
Watoto hao mapacha ambao walioshikana katika sehemu ya tumbo, wako katika hali salama pamoja na mama yao kwani shughuli hiyo ya uzalishaji ilifanywa kwa ustadi wa hali ya juu.
Wataalamu wa kiafya walifanikisha uzalishaji huo wa watoto mapacha walioshikana ni pamoja na Daktari Sumeiya wa magonjwa ya Wanawake, Daktari Kadivani wa upasuaji wa watoto, Daktari Kalama wa kuhudumia watoto pamoja na usaidizi wa wauguzi wa wodi za uzazi.
Daktari mkuu wa Hospitali ya Rufaa ya kaunti ya Kilifi, Dkt. Gilbert Angore, waliwapongeza madaktari waliofanikisha shughuli hiyo, akisema Mama na watoto hao wako katika hali nzuri na watasafirishwa hadi Hospitali kuu ya kitaifa ya Kenyatta jijini Nairobi kwa uangalizi zaidi.
Madaktari wa Hospitali ya Rufaa ya kaunti ya Kilifi wakiongozwa na Daktari mkuu Gilbert Angore wakiwa na Jemimah Sidi Nzai ambaye ni mama wa mapacha walioshikana
Hata hivyo mama wa watoto hao Jemimah Sidi Nzai alielezea jinsi alivyopokea matibabu hadi ya kujifungua watoto hao mapacha walioshikana, akielezea matumani yake ya kupata matibabu zaidi katika hospitali kitaifa ya Kenyatta jijini Nairobi
Maafisa wa Polisi kaunti ya Mombasa wanachunguza tukio la wizi dhidi ya mtalii wa kigeni lililotokea katika eneo la Nyali
Kulingana na ripoti ya maafisa wa polisi, mtalii huyo mwenye umri wa miaka 51 ambaye ni raia wa Marekani, anadai kulaghaiwa na kisha kushambuliwa na kundi la wanaume aliyokutana nao muda mfupi kabla ya tukio.
Ripoti hiyo imeeleza kwamba mnamo mwezi Aprili 9 mwaka huu, raia huyo wa kigeni akiwa katika mkahawa mmoja eneo la Nyali jijini Mombasa, alikutana na mwanaume aliyejitambulisha kama Alex, ambaye alimshawishi kuelekea katika nyumba ya Airbnb iliyoko karibu na mkahawa huo.
Taarifa hiyo ilifafanua zaidi kwamba alipofika katika chumba hicho, alikumbana na wanaume wengine watano waliokuwa wakimsubiri ambapo mlango ulifungwa na kisha akashambuliwa na kulazimishwa kutoa pesa na vitu vya thamani.
Wahalifu hao walitoroka na mali mbalimbali ikiwemo simu ya rununu, kompyuta mpakato (laptop), fedha taslimu pamoja na fedha za kigeni na pia walifanikiwa kutoa pesa kutoka kwenye kadi zake za benki kwa njia ya udanganyifu.
Maafisa wa polisi kutoka Bamburi kwa kushirikiana na maafisa wa upelelezi wa DCI Nyali walifika eneo la tukio na kuanza uchunguzi, ingawa hadi sasa hakuna mtu aliyekamatwa wala mali iliyopatikana.
Kesi hiyo imewekwa chini ya uchunguzi zaidi huku juhudi zikiendelea kuwabaini na kuwakamata wahusika wa tukio hilo.
Taarifa ya Mwanahabari wetu
Idara ya usalama eneo la Likoni kaunti ya Mombasa imesema inachunguza kifo cha mwanamke mmoja aliyefariki katika mtaa wa senti kumi.
Mkuu wa polisi wa Likoni Joseph Mutungi alisema mwanamke huyo anadaiwa kupoteza maisha wakati wakiwa nyumbani kwa mwanamme anayesemekana kuwa mchumba wake.
Taarifa za awali ziliarifu kuwa marehemu alikuwa mgonjwa na anadaiwa alifika hospitalini kusaka matibabu japo hakupata huduma na kurejea nyumbani bila kutibiwa.
Inasemekana baadaye mchumba wake alioondoka kwenda kazini na kumwacha chini ya uangalizi wa mwanamke mwengine katika ploti hiyo.
Hali yake inadaiwa kuzorota na hatimaye kuaga dunia.
Maafisa wa usalama walisema wanaendelea na uchunguzi kubaini chanzo cha kifo hicho.
Mwili wa marehemu unahifadhiwa katika chumba cha kuhifadhi maiti katika hospitali ya Coast general kwa uchunguzi zaidi.
Taarifa ya Mwanahabari wetu
Polisi wanachunguza tukio la wizi dhidi ya raia wa kigeni
Polisi eneo la Likoni-Mombasa inachunguza kifo cha mwanamke
