News
Kaunti ya Kilifi yalemewa na madeni ya kima cha 12B
Serikali ya kaunti ya Kilifi imebuni jopo la kuchunguza malimbikizi ya madeni ambayo yamedumu kwa muda mrefu bila ya wanakandarasi kulipwa zabuni zao.
Jopo hili lililoteuliwa na gavana wa kaunti ya Kilifi Gideon Maitha Mung’aro, linajukumu la kutathmini uhalali wa zabuni hizo huku kukiwa na shaka kuwa huenda baadhi ya kandarasi hizo zimetolewa kwa njia ya ulaghai.
Kaunti ya Kilifi ni miongoni mwa kaunti ambazo zinashtumiwa kwa malimbikizi ya madeni kwa wanakandarasi.
Bado kuna maswali mengi yanayokosa majibu kuhusiana na ongezeko la malimbikizi haya ya madeni ya kaunti ya Kilifi na utaratibu unaotumika kuwalipa wanakandarasi ambao sasa wanahoji ni vipi ulaghai huu ulivyotekelezwa pasi ya kuzingatiwa kwa utaratibu na mifumo ya kisheria katika utoaji wa zabuni.
Serikali ya kaunti ya Kilifi sasa inadaiwa takriban shilingi billioni 12 kwa mujibu wa ripoti ya hivi punde ya mkaguzi wa hesabu za serikali Nancy Gathungu.
Deni hilo linatokana na huduma za wanakandarasi ambao wametoa huduma kwa kaunti na baadhi yao wamekuwa wakidai pesa zao kwa zaidi ya miaka mitatu bila ya malipo.
Hali hii imetajwa kuchangia pakubwa kuzorota kwa uchumi wa kaunti ya Kilifi hasa ikizingatiwa mchango wa wafanyibiashara hao kwa uchumi wa kaunti.
Mbali na athari kubwa kwa uchumi na wanakandarasi wenyewe ni dhahiri kwamba miradi mingi ya maendeleo pia imekwama kutokana na makisio ya bajeti yasiyoendana na hali halisi ya mfuko wa bajeti wa kaunti.
Hivi majuzi Gavana wa kaunti ya Kilifi Gedion Maitha Mung’aro alifutilia mbali baadhi ya kandarasi na miradi ya maendeleo ili iweze kutathminiwa upya.
Uzinduzi wa ujenzi wa barabara za mashinani ulipewa wanakandarasi
Malimbikizi ya madeni haya ya mabilioni ya pesa pia yanatajwa kuchangia pakubwa msongo wa mawazo kwa baadhi ya wanakandarasi ambao wamejikuta wakiuziwa vyombo na mali zao ili kulipa mikopo waliotumia kufadhili kandarasi zao.
Hata hivyo wiki mbili zilizopita, kaunti ya Kilifi ilibuni Jopo maalum ya kuchunguza na kutathmini madeni hayo kabla ya kuidhinishwa kwa malipo.
Hali hii imeathiri kaunti nyingi ikiwemo kaunti ya Machakos ambako wanakandarasi wamelazimika kuandamana barabarani wakidai haki yao baada ya kusubiri malipo kwa muda nrefu.
Maandamano hayo yalipelekea maafisa wa usalama kutumia vitoa machozi kuwatawanya wanakandarasi hao huku baadhi yao wakikamatwa na kuwekwa korokoroni.
Taarifa ya Eric Ponda
Baadhi ya wajumbe wa bunge la Seneti chini ya mpango wa Seneti mashinani wamefanya ziara katika majengo ya bunge la kaunti ya Kilifi na kupokelewa na Karani wa bunge hilo Michael Ngala.
Wajumbe hao wa sekta mbalimbali wa bunge la Seneti wakiongozwa na Daniel Chania, wametathmini masuala mbalimbali ya bunge la kaunti ya Kilifi kama lina uwezo wa kuandaa ziara ijayo ya Seneti mashinani.
Seneti Mashinani ilianzishwa chini ya kifungu cha 126 ibara ya kwanza ya Katiba ya Kenya ya mwaka 2010, kinachoruhusu kikao cha bunge lolote kufanyika mahali popote ndani ya taifa la Kenya na kuanza wakati wowote kitakapopangwa na bunge.
Malengo ya vikao hivyo katika kaunti ni pamoja na kuhamasisha umma kuhusu kazi za bunge na Seneti, kuimarisha ushiriki wa umma katika shughuli za Seneti kwenye ngazi ya kaunti sawa na kutoa hamasa kwa wananchi kwa lengo la kuhimiza ushiriki umma katika utawala.
Baadhi ya wajumbe wa bunge la Seneti chini ya mpango wa Seneti mashinani wamefanya ziara katika majengo ya bunge la kaunti ya Kilifi
Bunge la Seneti limeanza maandalizi ya vikao vitakavyofanyika nje ya Nairobi, ambavyo vinatarajiwa kufanyika mwezi Septemba 2026.
Kaunti ya Kilifi ni miongoni mwa kaunti zilizoteuliwa kuwa kati ya zile zitazoandaa vikao hivyo kwa ajali ya umma kuwa na uelewa zaidi kuhusu shughuli za bunge hilo.
Wajumbe hao walikuwa na malengo pia ya kubaini upatikanaji wa miundombinu na huduma muhimu ili kuiwezesha Seneti kufanya uamuzi.
Kaunti nyingine zilizowahi kuandaa Seneti Mashinani ni pamoja na kaunti ya Uasin Gishu mwaka 2018, ikifuatiwa na kaunti ya Kitui mwaka 2019, kaunti ya Turkana mwaka 2023 na kaunti ya Busia mwaka 2025.
Taarifa ya Mwahoka Mtsumi
Huenda watumizi wa magari ya uchukuzi wa umma, wahudumu wa tuktuk na bodaboda wakalazimika kuongeza nauli kwa abiria kutokana na changamoto za ukosefu wa mafuta nchini na kuathiri zaidi shughuli za uchukuzi.
Hatua hii imetakana na changamoto za uhaba wa mafuta nchini baada ya kuibuka kwa sataka ya uagizaji wa mafuta ghushi kupitia bandari ya Mombasa.
Kulingana na serikali kupitia Wizara ya Kawi, sakata hiyo ya shilingi bilioni 12 ilikuwa imelata tani elfu 60 za mafuta ya petroli kinyume cha sheria pamoja na mipango ya serikali ya uagizaji mafuta wa serikali kwa serikali yaani G to G.
Sakata hii imepelekea Mkurugenzi mkuu wa Mamlaka ya kudhibiti kawi na bei za mafuta nchini EPRA Daniel Kiptoo, Katibu katika Idara ya petroli nchini Mohammed Liban na mkurugenzi wa Kampuni ya Kenya Pipeline Joe Sang kujiuzulu.
Kujiuluzu kwao kumetokana na kukamatwa na maafisa wa idara ya upelelezi wa jinai nchini DCI, kwa ushirikiano na Tume ya maadili na kupambana na ufisadi nchini EACC baada ya kutilia shaka zabuni iliyopewa kampuni binafsi ya One Petroleum Limited inayomilikwa na mfanyibiashara mashuhuri jijini Mombasa.
Wahudumu wa sekta ya bodaboda wakikabiliwa na changamoto za uhaba wa mafuta ya Petroli
Siku ya Jumanne, Waziri wa Kawi nchini Opiyo Wandanyi alifanya kikao na wakurugenzi wa kampuni za mafuta nchini na kuagiza shehena ya mafuta katika bandari ya Mombasa kurejeshwa kwani serikali haitambua shehena hiyo.
“Wahusika wa sakata hiyo walikuwa na njama ya kuongeza bei ya mafuta nchini kwa shilingi 14 zaidi kwa lita wakitumia nafasi ya vita vinavyoendelea kati ya Iran na Marekani na Israel, hiyo hatuta kubali”, alisema Wandayi.
Hatua hiyo ilikuwa inalenga pia kukwepa mpango wa serikali wa uagizaji mafuta kutoka mataifa ya miliki za kiarabu wa serikali kwa serikali yaani G to Go, akisema wahusika wa sakata ya ufisadi ni lazima wachukuliwe hatua.
Itakumbukwa kwamba rais William Ruto hivi majuzi alidokeza kwamba wahusika wote wa sakata ya ufisadi kwenye sekta ya mafuta watachukuliwa hatua, akishililia kwamba serikali haitakubali ufisadi nchini, huku akikosa kuweka wazi hatma ya maafisa hao wakuu wa serikali.
“Hawa walaghai wa mambo ya mafuta watakipata, hawaweze kuhepa kwa sababu haiwezekani katika taifa letu la Kenya watu wanaone tuko na shida ya mashariki ya kati wanakuja kukoroga shida nyengine hapa Kenya, serikali itakabiliana kikamilifu na wafisadi”, alisema Rais Ruto.
Taarifa ya Mwahoka Mtsumi
Wajumbe wa bunge la Seneti wazuru kaunti ya Kilifi
Sakata ya mafuta yaathiri sekta ya uchukuzi nchini
