Entertainment
Steven Otieno: Niliweka Video ya Kujiua WhatsApp – Ilibadilisha Maisha Yangu
Katika eneo la Mnarani, Kaunti ya Kilifi, mwanaharakati wa mazingira Stephen Otieno anasimama kama ishara ya ushindi dhidi ya changamoto za maisha. Ni hadithi ya maumivu, kimya, msongo wa mawazo – lakini pia ni simulizi ya matumaini, uponyaji, na kuibuka upya.
Kwenye mahojiano ya kusisimua katika kipindi cha Janjaruka 254, Otieno, amefungua moyo wake kwa mara ya kwanza hadharani kuhusu kipindi kigumu zaidi maishani mwake – alipokaribia kujitoa uhai.
Mizigo ya Matumaini Yasiyolingana na Uhalisia
Baada ya kumaliza masomo, wazazi wa Otieno walikuwa na matarajio makubwa kutoka kwake. Walitarajia msaada wa kifedha, msaada wa kijamii – na hata matumaini ya mafanikio ya haraka. Lakini maisha halisi yalikuwa tofauti. Kipato chake kilikuwa cha ulinzi wa usiku – kazi maarufu kama “askari gongo” – yenye malipo duni na mazingira magumu.
Wazazi wake hawakuweza kuelewa hali hiyo. Walizidi kumlilia msaada bila kufahamu kuwa hata yeye alikuwa akihangaika kuendesha maisha yake na ya mke wake, ambaye alimwoa muda mfupi baada ya kuhitimu masomo. Hilo liliwafanya wazazi wake kuchanganyikiwa zaidi – na hilo ndilo lilikuwa chanzo kikuu cha msongo wa mawazo kwa kijana huyu.
Kimya Kilichokaribia Kugharimu Maisha
Kosa kubwa ambalo Otieno anakiri ni kutoongea. Hakumweleza mtu yeyote kuhusu msukosuko huo – hata mkewe. Alibeba msalaba huo kimya kimya hadi usiku mmoja, akiwa kazini kwenye eneo lisilo na watu wengi, alipoamua kujitoa uhai. Kabla ya kuchukua hatua hiyo ya mwisho, alirekodi video na kuiweka kwenye WhatsApp status yake na kushiriki kwenye kundi moja la marafiki.
Simu zaidi ya 100 ziliingia kwa haraka – watu waliotaka kujua tatizo na kumrai asikate uhai wake. Video ile ya sekunde chache ilibadili kila kitu.
Mwanzo wa Safari ya Uponyaji
Msimamizi wake kazini alikimbia hadi eneo alilokuwepo Steven usiku huo. Ndipo Steven alipomwaga moyo wake – kwa mara ya kwanza – na kueleza hali halisi aliyokuwa nayo. Hilo ndilo lilikuwa chimbuko la safari yake mpya.
Kikao cha familia kilifanyika. Wachungaji walihusishwa. Wataalamu wa afya ya akili walimsaidia. Na kwa mara ya kwanza, jamii ilimskia – na kumwelewa. Aliambiwa kwamba hakustahili kupambana peke yake. Aliambiwa kwamba alihitaji kuongea.
Kugeuka na Kuwa Mchochezi wa Mabadiliko
Kupitia shirika la Baha Madzo Gadze for Charity, Otieno alipata nafasi ya kujitolea katika shughuli za kulinda mazingira. Alipewa majukumu madogo madogo ambayo baadaye yalikuza nafasi yake hadi kuwa Naibu Mwenyekiti, kisha Mwenyekiti wa kikundi hicho. Hapo ndipo aligundua maana ya kweli ya maisha – ya kuwa msaada kwa wengine na kwa mazingira yanayotuzunguka.
Anasema: “Sijafikia malengo yangu kikamilifu, lakini nipo kati ya asilimia 40 hadi 50. Hilo ni jambo kubwa kwa mtu aliyekaribia kujiua. Sasa naona mwangaza.”
Ujumbe kwa Wengine
Steven Otieno amebeba ujumbe mzito kwa vijana na watu wote wanaopitia msongo wa mawazo:
”Ongea na mtu. Hata kama ni mtu wa barabarani. Pigia simu mtu unayemwamini. Post kwa mitandao ya kijamii kama huna wa kuongea naye. Usijifiche. Tangamana. Utajifunza na kusaidiwa.”
Anamalizia kwa kusema:
“Bado naihifadhi ile video niliyorekodi nikitaka kujiua. Sijatamani kuifuta kwenye hifadhi zangu. Sio kwa sababu naifurahia, bali kwa sababu ni kumbukumbu ya wapi nimetoka. Leo hii, nipo hapa kwa sababu niliongea. Na nitaendelea kuzungumza ili wengine waone kuwa kuna tumaini.”
Katika ulimwengu ambapo matarajio ya jamii yanaweza kuvunja nafsi, hadithi ya Stephen Otieno ni ushuhuda wa nguvu ya mazungumzo, msaada wa kijamii, na kuamini kuwa maisha yana thamani – hata unapohisi umekwama. Leo hii, sio tu kuwa amepona, bali amegeuka kuwa sauti ya mabadiliko – kwa binadamu na mazingira.
Mjadala mkali umeibuka katika kipindi cha COCO Asubuhi baada ya Shuga Boy, shabiki wa Manchester United, kuweka dau zito na la kushangaza dhidi ya Main Man Rio ambaye ni shabiki wa Arsenal.
Akizungumza kwenye kipindi cha COCO Asubuhi, kinachoendeshwa na Tatu Sure—inayojumuisha Shuga Boy mwenyewe, Main Man Rio na Solomon Zully—Shuga Boy alifunguka, akidai kuwa Arsenal hawana uwezo wa kubeba hata kombe moja msimu huu licha ya matarajio makubwa kutoka kwa mashabiki wao.
Kwa mujibu wa Shuga Boy, mashabiki wa Arsenal wamekuwa wakijipa matumaini makubwa ya kutwaa hadi vikombe vinne, lakini hali halisi uwanjani haioneshi dalili hizo. Alienda mbali zaidi na kuweka dau la kipekee kwa Main Man Rio, ambaye ni shabiki mkubwa wa Arsenal.
“Nilimwambia Main Man Rio, wakibeba kombe nitampa gari yangu. Sasa naongeza dau—wakishinda kikombe msimu huu, nitampa gari yangu pamoja na dadangu,” alisema Shuga Boy kwa msisitizo, kauli iliyozua kicheko na mjadala mkali studio.
Kauli hiyo imekuja katika kipindi ambacho Arsenal wamekuwa wakionyesha ushindani mkubwa chini ya kocha Mikel Arteta, wakijijenga kama moja ya timu zinazowania ubingwa wa Premier League. Licha ya maendeleo hayo, ukosefu wa vikombe katika misimu mingi bado unawapa wapinzani wao nafasi ya kuwabeza.
Kwa upande mwingine, Manchester United nao wanapitia kipindi cha mabadiliko, wakijaribu kurejea kwenye ubora wao wa zamani waliouonyesha enzi za Sir Alex Ferguson. Licha ya changamoto, bado wana historia nzito ya mafanikio, jambo linalowapa mashabiki wao kujiamini wanapojadili soka la Uingereza.
Usiku wa leo, macho ya mashabiki yataelekezwa kwenye mchezo wa ligi kati ya Manchester United dhidi ya Leeds United—mchezo unaotarajiwa kuwa na ushindani mkali, huku Shuga Boy akitumaini timu yake itapata ushindi na kuendeleza presha kwa wapinzani wao.
Wakati mabishano yakiendelea mitandaoni na kwenye studio za redio, swali kubwa linabaki: Je, Arsenal wataweza kuwanyamazisha wakosoaji wao kwa kubeba angalau kombe moja msimu huu, au kauli ya Shuga Boy itageuka kuwa unabii?
Staa wa Bongo Fleva Alikiba ameibua mjadala mzito kufuatia kauli yake aliyoitoa baada ya kufanya show kubwa na yenye mafanikio jijini Mwanza, nchini Tanzania.
Baada ya kupanda jukwaani na kuonesha kiwango chake cha juu cha uimbaji na burudani, King Kiba aliacha mashabiki wakizungumza zaidi si tu kuhusu show yake, bali pia kauli yake iliyokuja mwishoni mwa performance yake. Akiwa mbele ya umati mkubwa wa mashabiki, alisema kwa kujiamini:
“Watatoa ngoma nyingine na nyingine, na nyingine, na nyingine, na nyingine… halafu mimi natoa nyingine, moja tu.”
Kauli hiyo imezua tafsiri mbalimbali miongoni mwa mashabiki na wadau wa muziki, wengi wakiona kuwa ni ujumbe unaolenga tofauti iliyopo kati ya wasanii wanaotoa kazi nyingi kwa wakati mfupi na wale wanaochagua kutoa kazi chache lakini zenye ubora wa hali ya juu. Kwa muktadha huo, Alikiba anaonekana kusimama katika kundi la wasanii wanaoamini katika ubora kuliko wingi.
Kwa muda mrefu sasa, Kiba amekuwa akijulikana kwa mtindo wake wa utoaji wa muziki usio wa haraka, lakini unaolenga ubora wa juu na maisha marefu ya kazi zake sokoni. Hii ni tofauti na mwenendo wa sasa wa tasnia ya muziki wa kidigitali ambapo baadhi ya wasanii huchagua kutoa nyimbo mfululizo ili kubaki juu ya chati na kwenye algorithms za streaming platforms.
Kauli yake pia imekuja katika kipindi ambacho wimbo wake mpya Finale, aliomshirikisha Bien, unaendelea kufanya vizuri kwenye majukwaa ya kidigitali. Video ya wimbo huo imekuwa ikipata watazamaji wengi na maoni chanya kutoka kwa mashabiki wa Afrika Mashariki na kwingineko, hali inayoongeza uzito wa ujumbe wake kuwa kazi moja bora inaweza kuwa na athari kubwa kuliko nyingi zisizo na nguvu sawa.
Baadhi ya wachanganuzi wanasema kijembe hicho kimemlenga mpinzani wake wa karibu Diamond Platnumz ambaye ameachia nyimbo mbili (Happy na Joy) kwenye kipindi kifupi ambacho King Kiba kaachia wimbo mmoja unaofanya vizuri zaidi ya nyimbo za Simba.
Hata hivyo, mjadala unaoibuliwa na kauli hiyo una pande mbili. Wapo wanaounga mkono msimamo wa Kiba wakisema ubora ndiyo unaojenga legacy ya msanii. Lakini pia wapo wanaoamini kuwa katika ushindani wa sasa, consistency ya kutoa nyimbo mara kwa mara ni muhimu ili kubaki relevant kwenye soko lenye ushindani mkubwa.
Kwa mtazamo wa kina, kauli ya Alikiba si tu maneno ya jukwaani bali ni tafakari ya mkakati wake wa muziki na namna anavyoiona tasnia kwa ujumla. Inaibua swali muhimu kwa wasanii na mashabiki pia—je, thamani ya msanii ipo kwenye wingi wa kazi anazotoa, au kwenye ubora na uimara wa kazi chache anazoachia?
Hadi sasa, jambo moja liko wazi—kauli hiyo imefanikiwa kuamsha mjadala mkubwa, na kwa mtindo wa King Kiba, huenda hata hilo lenyewe ni sehemu ya mchezo wake wa kisanii.
Wadau wa sekta ya uchukuzi wasitisha mgomo wao
Mshukiwa wa ulanguzi na usafirishaji wa watoto anyimwa dhamana
