Sports
Kiungo Eze Eberechi Aangamiza Spurs Tena Arsenal wakirejea katika mbio za Ubingwa
Kiungo wa Arsenal, Eberechi Eze, aliiumiza tena Tottenham baada ya kufunga mabao mawili yaliyosaidia vinara hao wa Ligi Kuu ya England kuifunga Tottenham mabao 4-1 katika dabi ya kaskazini mwa London Jumapili.
Kikosi cha kocha Mikel Arteta kilimaliza msururu wa mechi mbili bila ushindi na kujitanua kileleni kwa tofauti ya pointi tano dhidi ya Manchester City walioko nafasi ya pili. Mbali na mabao ya Eze, mshambuliaji Viktor Gyokeres pia alifunga mabao mawili katika ushindi huo mkubwa.
Baada ya kukataa kujiunga na Tottenham msimu uliopita, Eze ameonekana kung’ara zaidi akiwa katika jezi ya Arsenal hasa dhidi ya wapinzani hao wa jadi. Gyokeres naye alituliza presha mapema kipindi cha pili, kabla Eze hajafunga bao la tatu na Gyokeres kukamilisha ushindi huo muhimu.
Kwa Gyokeres, aliyekuwa na msimu mgumu baada ya kuhamia kutoka Sporting Lisbon, mabao hayo yalikuwa ya ukombozi mkubwa, sawa na ilivyokuwa kwa Eze.
Arsenal walikuwa wameanza kuyumba katika mbio za ubingwa baada ya sare dhidi ya Brentford na Wolves, matokeo yaliyofufua matumaini ya Manchester City. Ushindi wa City wa mabao 2-1 dhidi ya Newcastle ulikuwa umepunguza pengo hadi pointi mbili kabla ya dabi hiyo.
Kocha Arteta aliwahimiza wachezaji wake kuvumilia presha ya mbio za ubingwa, akisema yeyote asiyeweza kustahimili “kelele na mashambulizi” bora aondoke klabuni na kuwaachia wengine waandike historia yao wenyewe.
Hata hivyo, licha ya ushindi huo, hatma ya ubingwa bado iko mikononi mwa Manchester City. Iwapo kikosi cha Pep Guardiola kitashinda mechi zake zote 11 zilizosalia, kitachukua taji hilo bila kujali matokeo ya Arsenal katika mechi zao 10 zilizobaki.
Arsenal sasa hawajapoteza katika dabi nane zilizopita dhidi ya Tottenham. Mashabiki wao walifurahia ushindi huo huku wakikumbusha wapinzani wao kuwa hakuna uhakika wa kukutana tena msimu ujao.
Tottenham wako pointi nne tu juu ya eneo la kushuka daraja, huku wakiongeza idadi ya mechi bila ushindi hadi tisa katika mchezo wa kwanza wa kocha wa muda Igor Tudor baada ya Thomas Frank kutimuliwa.
Ingawa Tudor ana uhakika kwa asilimia mia moja kuwa klabu hiyo itasalia Ligi Kuu, hatari ya kushuka daraja bado ni tishio baada ya kushinda mechi mbili pekee katika 18 zilizopita.
Arsenal walitangulia kufunga dakika ya 32 baada ya Pape Sarr kupoteza mpira karibu na lango lao. Bukayo Saka alimchezea krosi Eze aliyepiga voli safi kutoka umbali wa yadi 10 na kufunga bao la kwanza.
Hata hivyo, uongozi huo ulidumu kwa dakika mbili tu baada ya kosa la Declan Rice kupokonywa mpira nje kidogo ya eneo la hatari, Kolo Muani akafunga kwa shuti kali lililomshinda kipa David Raya.
Kipindi cha pili kilianza kwa presha kutoka Arsenal, na dakika ya 47 Jurrien Timber alimpa pasi Gyokeres aliyepata nafasi kutokana na uzembe wa safu ya ulinzi ya Tottenham na kupiga shuti kali lililomshinda kipa Guglielmo Vicario.
Eze alifunga bao la tatu dakika ya 61 baada ya makosa mengine ya ulinzi wa Spurs, akitumia vyema mpira uliomkuta ndani ya eneo la hatari.
Gyokeres alihitimisha ushindi huo dakika za majeruhi kwa kufunga bao la nne huku mashabiki wa Tottenham wakianza kuondoka uwanjani kwa huzuni.
Ushindi huo umeirejesha Arsenal katika mstari wa mbele wa mbio za ubingwa huku Tottenham wakizidi kusukumwa kuelekea hatari ya kushuka daraja.
Mamia ya waendesha baiskeli walijumuika na viongozi wa kaunti ya Mombasa pamoja na wadau wa sekta ya usafiri walijitokeza kuonyesha dhamira ya kuendeleza miundombinu salama ya waendesha baiskeli na kuhimiza matumizi ya usafiri endelevu.
Waendeshajio hao wa baiskeli walionyesha dhamira hiyo kufuatia kuendelea kushuhudia maendeleo makubwa katika ujenzi wa njia maalum za waendesha baiskeli, hatua inayolenga kupunguza msongamano wa magari, kuboresha afya ya wananchi na kupunguza uzalishaji wa hewa kaa.
Mkurugenzi Mkuu wa EBee Africa, Maarten Fonteijn, alisema mpango huo pia uliambatana na kusherehekea kukamilika kwa awamu ya kwanza ya njia ya waendesha baiskeli katika kaunti hiyo.
Alibainisha kuwa matumizi ya baiskeli ni suluhisho mojawapo la changamoto ya msongamano wa magari mjini Mombasa kwani yanawawezesha wananchi kufika maeneo yao kwa haraka huku wakiboresha afya zao.
“Tunafurahia kukamilika Kwa njia ya baiskeli itasaidia pakubwa pia katika kupunguza msongamani wa magari”
Kwa upande wake, mkurugenzi wa Kanda wa ITDP Africa Claire Birungi alisema idadi kubwa ya watu waliojitokeza kushiriki hafla hiyo ni ishara kwamba wananchi wamekubali matumizi ya baiskeli na sasa kilichobaki ni kuimarisha miundombinu salama ya waendesha baiskeli.
Aliongeza kuwa ujenzi wa njia ya baiskeli katika Barabara ya Links tayari umeanza, ambapo takribani kilomita nne zimejengwa na mipango ipo ya kuipanua hadi kilomita nane.
“ Zaidi ya waendesha baiskeli 200 wamejitokeza kuunga mkono shughuli hii. Tunahitaji kuendelea kuwekeza katika miundombinu salama ya baiskeli inayounganishwa na mifumo mingine ya usafiri wa umma,”
Wadau hao walieleza kuwa miundombinu bora ya baiskeli itasaidia watoto kusafiri kwa usalama, kukuza biashara kwa kurahisisha ufikiaji wa wateja na kuwapa wananchi njia nafuu na salama ya usafiri.
Kwa upande wake meneja wa programu Global Designing Cities Initiative, Regatu Solomon alisema Mombasa ni miongoni mwa miji kumi duniani iliyochaguliwa kati ya miji 275 kufaidika na mpango wa Bloomberg Initiative for Cycling Infrastructure (BICI), unaosaidia miji kujenga miundombinu salama na jumuishi ya waendesha baiskeli.
“Tunatoa msaada wa kiufundi na kifedha ili kusaidia Mombasa kutekeleza miundombinu salama ya waendesha baiskeli kwa manufaa ya watumiaji wote wa barabara,” alisema.
Nae Naibu Gavana wa Kaunti ya Mombasa, Francis Thoya, alisema matumizi ya baiskeli yanazidi kuwa mtindo wa maisha na suluhisho la changamoto za usafiri zinazokabili kaunti hiyo.
Aliweka wazi kuwa serikali ya kaunti kwa ushirikiano na wadau mbalimbali tayari imeanza kupanua miundombinu ya baiskeli kutoka Barabara ya Links kuelekea katikati ya jiji ili kuwahamasisha wananchi kutumia zaidi usafiri huo.
Zaidi ya waendesha baiskeli 200 wajitokeza kuunga mkono shughuli usafiri endelevu wa baiskeli Mombasa
Thoya pia alisisitiza umuhimu wa baiskeli katika kulinda mazingira kwa kupunguza uzalishaji wa hewa chafu kutoka kwa magari.
“Mombasa ni kaunti ndogo zaidi nchini Kenya lakini inaendelea kukua kwa kasi. Eneo ni finyu na msongamano wa magari unaongezeka kila siku. Ni wakati wa wananchi kuanza kufikiria njia mbadala za usafiri,ambayo pia itasaidia kulinda mazingira yetu,”
Mombasa inaelekea kuwa miongoni mwa miji inayoongoza katika kuhamasisha matumizi ya baiskeli kama njia salama, nafuu na endelevu ya usafiri.
Taarifa ya Mwanahabari wetu
Sports
Bingwa wa Afrika mbio za mita 100 mkenya Ferdinand Omanyala azidi kuthibitisha ubora wake mbio Botswana Golden Grand Prix akimaliza wa pili na sekunde 9.95
Mwanariadha mwenye kasi zaidi barani Afrika, Ferdinand Omanyala, amethibitisha kurejea kwake katika kiwango cha juu kwa mbio za kuvutia za sekunde 9.95 kwenye mashindano ya Botswana Golden Grand Prix yaliyofanyika Jumapili, Aprili 26 jijini Gaborone.
Katika fainali ya wanaume ya mita 100 iliyokuwa na ushindani mkali, Mkanada Jerome Blake alishinda kwa sekunde 9.93, huku mwenzake Andre De Grasse na Omanyala wakitumia sekunde 9.95 katika ushindani wa karibu sana. Ingawa awali ilionekana kama nafasi ya pili iligawanywa, matokeo rasmi yalimweka Omanyala katika nafasi ya tatu kwa tofauti ndogo sana.
Licha ya nafasi hiyo, matokeo hayo yaliashiria mbio ya tatu mfululizo kwa Omanyala kukimbia chini ya sekunde 10 ndani ya siku saba tu, na kukamilisha kurejea kwa nguvu kwa mshikiliaji wa rekodi ya Afrika. Mkenya huyo alianza mfululizo huo kwa ushindi wa sekunde 9.98 katika Addis Ababa Grand Prix Aprili 18, kabla ya kuwapa mashabiki wa nyumbani burudani kwa ushindi wa sekunde 9.96 katika mashindano ya Kip Keino Classic jijini Nairobi Aprili 24.
Mfululizo huu wa matokeo unaashiria kurejea kwa nguvu kwa Omanyala baada ya msimu mgumu wa 2025 uliokumbwa na majeraha na kutokuwepo kwa uthabiti, ambapo alishindwa kushuka chini ya kiwango muhimu cha sekunde 10.
Sasa macho yanaelekezwa kwenye World Athletics Relays zitakazofanyika Mei 2–3, pia jijini Gaborone, ambapo Omanyala anatarajiwa kuiongoza timu ya Kenya katika mbio za kupokezana vijiti za 4x100m. Mashindano hayo yatakuwa hatua muhimu kuelekea kufuzu kwa michuano ya Ultimate Championship itakayofunga msimu.
Kwa kuzingatia mashindano yajayo ya Continental Tour Gold na michuano mikubwa kama Michezo ya Jumuiya ya Madola itakayofanyika Glasgow, kurejea huku kwa kasi kwa Omanyala kumekuja wakati muafaka anapojenga upya kasi yake dhidi ya wanariadha bora duniani.
Aisha Jumwa akihama rasmi chama cha UDA
Mahakama ya Kilifi yaagiza kuzuiliwa Washukiwa 7 wa mauaji
