News
Murkomen ahimiza ushirikiano wa pamoja na wadau wa masuala ya ubaharia
Waziri wa usalama wa ndani Kipchumba Murkomen, ametoa wito wa kuimarishwa kwa ushirikiano kati ya washirika na wadau ili kuimarisha usalama wa baharini na maziwa makuu.
Akizungumza wakati wa ufunguzi rasmi wa kongamano la kamati ya uongozi wa Jukwaa la ushirikiano wa taarifa ya kanda ya Indo-Pasifiki (IORIS) lililofanyika mjini Mombasa, Waziri huyo alisisitiza kuwa ushirikiano wa mapema ni muhimu katika kukabiliana na vitisho vinavyoibuka vya usalama wa baharini.
“Ushirikiano wa mapema na muhimu katika kulinda usalama wetu wa baharini,” alisema Murkomen.
Kongamano hilo la siku tatu linaandaliwa kwa pamoja na huduma ya Walinzi wa Pwani ya Kenya (KCGS) pamoja na mradi wa njia muhimu za baharini wa Indo-Pasifiki unaofadhiliwa na Umoja wa Ulaya (EU-CRIMARIO), ukiwaleta pamoja wadau wa usalama wa baharini..
Mradi wa EU-CRIMARIO umeundwa kuimarisha usalama na ulinzi wa baharini kupitia kuboreshwa kwa ushirikiano wa taarifa na uratibu wa operesheni.
Kongamano la siku tatu la kamati ya uongozi la Jukwaa la ushirikiano wa taarifa ya kanda ya Indo-Pasifiki (IORIS), Mombasa
Mpango wake mkuu, IORIS, ni jukwaa salama na lisiloegemea upande wowote linalotumia mtandao, unaounganisha zaidi ya mashirika 150 kutoka nchi 70, na kuwezesha uratibu wa operesheni za baharini kwa wakati halisi.
Kauli za Murkomen ilijiri kufuatia tangazo la Rais William Ruto kwamba kampuni ya usafiri wa baharini ya Norway, Wilhelmsen, itaajiri mabaharia 1,000 kutoka Kenya, baada ya mazungumzo na kampuni hiyo.
Hafla hiyo ilihudhuriwa na Mkurugenzi wa EU-CRIMARIO Martin Cauchi Inglott, Mkurugenzi mkuu wa huduma ya walinzi wa Pwani ya Kenya Bruno Shioso, Naibu mkuu wa ujumbe wa umoja wa Ulaya nchini Kenya Ondrej Simek, pamoja na washkadau wengine.
Taarifa ya Mwahoka Mtsumi
Baraza la Wazee wa jamii ya Sekuye eneo la Moyale kaunti ya Marsabit limejitokeza na kulalamikia kuharibiwa kwa mazingira ya maeneo yao hasa katika kijiji cha Dabel kutokana na uchimbaji madini kiholela.
Wazee hao wamewalaumu viongozi wao ikiwemo serikali ya kaunti kwa kulinyamazia suala hilo huku wakaazi wakiendelea kunyanyaswa raslimali zao.
Baraza hilo, chini ya Katibu wake mkuu Haji Hassan Tepo, limedai kwamba uchimbaji huo wa madini kiholela, unyakuzi wa ardhi, unyanyasaji wa jamii umechangiwa na baadhi ya wawekezaji kutoka taifa Jirani la Somalia na Ethiopia ambao hawana vibali halali.
Hassan aliimtaka serikali kupitia Waziri wa madini nchini Hassan Ali Joho kuingilia kati suala hilo na kuhakikisha uchumbaji wa madini katika kijiji cha Dabel unasitishwa kwani wawekezaji zaidi ya 20 wamebuni makundi na kuendelea kuwanyanyasa wenyeji.
Hassan aliweka wazi kwamba baraza hilo pamoja na jamii ya Sekuye linapinga mpango huo na kusisitisha kwamba hawatakubali ardhi yao wanayoitegemea kwa shughuli mbalimbali kutumika vibaya.
Naibu Mwenyekiti wa baraza hilo Abdukadir Dilo alisema hali hiyo imewasabibishia hasara kwani mifugo imeangamia, uchumi wa kijiji hicho ukididimia zaidi na akamtaka rais Ruto kuingilia kati kwani licha ya Waziri Murkomen kufunga uchumbaji kufuatia utovu wa usalama bado wawekezaji kutoka Ethiopia na Somali wamekuwa wakiendeleza mpango huo.
Wazee hao hata hivyo walisisitiza kwamba hawatakubali kuachilia ardhi yao kunyakuliwa na watu wanaodai kuwa wawekezaji ilhali vijana wa eneo hilo hawana kazi, huku wanafunzi wakiacha shule na zaidi ya akina mama 22 wakiachwa na wanaume zao kufuatia suala hilo katika kijiji cha Dabel.
Taarifa ya Mwahoka Mtsumi
Wadau mbalimbali wa mazingira katika kaunti ya Kilifi waliungana katika chuo kikuu cha pwani kuadhimisha siku ya mazingira ulimwenguni, hafla ambayo ilianza na zoezi la upanzi wa miche elfu 5.
Katika hafla ambayo iliongozwa na mkurugenzi wa mazingira kaunti ya Kilifi, Jimmy Yaa walisema licha ya taifa kuwekeza katika matumizi ya kawi safi na upanzi wa miche, bado juhudi zaidi zinapaswa kuwekwa kukabiliana na changamoto za kimazingira zinazotatiza harakati hizo.
Kwa upande wa Ruwa Kalama kutoka idara ya misitu kaunti ya Kilifi alisisitiza haja ya Wananchi kupanda miche ya matunda na kuwaonya wakaazi dhidi ya kukata miti kiholela ili kukabiliana na madailiko ya hali ya anga.
“Kadri tunavyopanda miche, tusisahau kupanda ile ya matunda na pia kaunti ya Kilifi ni Kati ya zile kaunti ambazo zinakata miti kihole”, alisema Kalama
Naye Kamanda wa Polisi eneo la Kilifi Kaskazini, kaunti ya Kilifi Stanley Tanui, alisema idara ya usalama imekuwa katika mstari wa mbele kuhakikisha sheria ambazo zinawekwa kudhibiti uchafuzi wa mazingira zinatekelezwa vilivyo.
“Kama idara ya usalama Kilifi Kaskazini, hata sisi tunahusika pakubwa katika uhifadhi wa mazingira na kuhakikisha sheria za kudhibiti uchafuzi wa mazingira zinatekelezwa vilivyo” alisema Tanui
Maadhimisho haya yalilenga kuhamasisha jamii kuchukua hatua madhubuti za kupunguza athari za uharibifu wa mazingira na mabadiliko ya hali ya anga kote ulimwenguni.
Kauli mbiu ya mwaka huu ni “Kuchukua hatua dhidi ya mabadiliko ya hali ya hewa”
Taarifa ya Janet Mumbi
Baraza la Jamii ya Sekuye lalamikia uchimbaji wa madini kiholela
Murkomen ahimiza ushirikiano wa pamoja na wadau wa masuala ya ubaharia
