News
Wakfu wa George Kithi watoa ufadhili wa karo kwa wanafunzi Kilifi
Wakfu wa George Kithi unaoimarisha jamii kupitia kufadhili wa masomo ya wanafunzi werevu wanaokabiliwa na changamoto za ukosefu wa karo, misaada ya matibabu kwa wagonjwa kutoka Familia maskini pamoja na miradi ya kijamii, uliandaa hafla maalumu ya kutoa misaada ya masomo kwa kipindi cha masomo cha mhula wa pili.
Wazazi walionufaika na msaada huo walipokea stakabadhi za kuthibitisha misaada hiyo ya masomo.
Kwa mujibu wa Mratibu mkuu wa mipango ya Wakfu huo Mwanyule Baya Mweri, Wakfu huo unashughulikia miradi mingi ya kusaidia jamii.
Maafisa wa Wakfu wa George Kithi wamkabidhi mzazi hundi ya karo ya ufadhili wa masomo kwa wanafunzi werevu
Miongoni mwa miradi hiyo ni gari la kusafirisha miili kwa wale wanaokumbwa na changamoto za mazishi.
Wakfu huo pia unashughulikia msaada wa matibabu kwa wagonjwa wasiojiweza.
Wakati wa hafla hiyo wawaniaji nyadhifa mbalimbali za kisiasa ikiwa ni pamoja na ubunge, uwakilishi wa kina mama na Wawakilishi wadi wa Chama cha UDA waliendeleza kampeni zao kwa ajili ya uchaguzi mkuu ujao.
Wawaniaji wa nyadhifa mbalimbali za kisiasa ikiwa ni pamoja na ubunge, Uwakilishi wa kina mama na Wawakilishi wadi wa Chama cha UDA wameelezea juhudi za kupiga jeki sekta ya elimu kaunti ya Kilifi
Aidha walikashfu vikali kisa cha unajisi na mauaji ya msichana wa miaka saba katika kijiji cha Kwa Nzai eneo la Mwezang’ombe katika eneo bunge la Kilifi kaskazini kaunti ya Kilifi.
Wazazi waliohudhuria hafla hiyo walichukua fomu za maombi kwa ajili ya usaidizi ujao wa masomo huku waliofadhiliwa wakiupongeza Wakfu huo.
Taarifa ya Lolani Kalu
Mbunge wa Nyali kaunti ya Mombasa Mohamed Ali amepuzilia mbali madai ya kuhusishwa na siasa za ukabila kwenye kaunti hiyo, akisema anafanya siasa zake bila kujali dini, kabila au hata eneo.
Akizungumza huko Nyali, Ali alisema kuna baadhi ya viongozi katika kaunti ya Mombasa, ambao wamekuwa wakiendekeza propaganda za kumhusisha na siasa za migawanyiko ili kumharibia jina taifa linapojiandaa kwa uchaguzi mkuu ujao wa 2027.
Ali ambaye alitangaza kuwania wadhifa wa ugavana kaunti ya Mombasa, aliwataka viongozi kufanya siasa zao kwa kunadi sera zao kwa wakaazi na maendeleo ambayo watatekeleza na sio kutumia suala la ukabila kuwachafulia wengine jina.
“2017 hakuna mtu aliniita mkabila, 2022 hakuna mtu aliniita mkabila, 2027 wanasema Mohamed Ali ni mkabila.Mimi Mohamed Ali, mimi nauliza nikisimama hapa juu ya gari, niseme kabila zote za Kenya wanaweza pewa nafasi ya ugavana ni kuna makosa?,basi sasa wanazunguka wakisema Mohamed ni mkabila kwasababu ameanza kufungua watu macho’’ alisema Ali.
Aidha, Ali alisema ataendelea kuzuru maeneo mbalimbali ya kauti ya Mombasa kunadi sera zake na kuwataka wakaazi wa kaunti hiyo kuwachagua viongozi wanaofaa ambao wataimarisha kaunti hiyo kimaendeleo.
‘’Mimi nimewaambia nitatembea hii Mombasa kwa uwezo wake mwenyezi mungu kutetea wananchi wa Mombasa’’ aliongeza Ali
Taarifa ya Janet Mumbi
Ripoti iliyotolewa hivi karibu na Shirika la Chakula duniani WFP ilionyesha kwamba zaidi ya wakimbizi nusu milioni wanaoishi katika kambi za wakimbizi za Kakuma na Dadaab zilizoko nchini Kenya, wako katika hatari ya kuangamia kutokana na baa la njaa.
Kambi hizi ambazo zinahifadhi wakimbizi wengi zaidi kutoka nchini Sudan Kusini, Jamhuri ya Kidemokrasia ya Kongo na Somalia, ziko hatari iwapo zitakosa misaada ya chakula.
Kufuatia hali hiyo ambayo pia imechangiwa na mashirika ya kimataifa kusitisha ufadhili, sasa hali huenda ikawa tofauti baada ya taifa la Korea kwa ushirikiano na Kenya kutoa ufadhili wa shehena ya nafaka ya zaidi ya tani elfu 10 ambayo inakadiriwa kuwa kima cha shilingi milioni 1.2.
Katibu katika Idara ya uhamiaji nchini Belio Kipsang, aliyepokea msaada huo wa Chakula mjini Mombasa na kuhifadhiwa katika maghala ya Shirika la WFP, ameonya kwamba iwapo Kenya itakosa kupokea msaada kutoka kwa washirika na wafadhili wengine, basi italazimika kuchukua maamuzi magumu, ikiwemo kuwaondoa baadhi ya wakimbizi.
“Nyuma ya kila takwimu kuna familia ambazo ustahimilivu wao unaendelea kujaribiwa kila siku: akina mama wanaokosa kula ili watoto wao wapate chakula, watu walio katika mazingira hatarishi wakiruka milo, na vijana wanaokabiliwa na mustakabali usio na uhakika. Hizi si takwimu za kufikirika. Zinawakilisha watu halisi ambao heshima yao, afya yao na matarajio yao ya maisha yanategemea maamuzi tunayofanya kwa pamoja,” alisema.
Wakati wa hafla hiyo ya kupokea msaada huo wa chakula kwa wakimbizi wa Kakuma na Dadaab, Mkurugenzi wa Shirika la WFP nchini Kenya Betty Ka, alisema shehena ya nafaka itasaidia kuwahudumia takribani wakimbizi nusu milioni katika miezi ijayo.
“Usafirishaji huu unaonyesha umuhimu wa ushirikiano imara katika mnyororo wa ugavi wa misaada ya kibinadamu, ambapo ushirikiano huu kati ya Kenya, Mamlaka ya bandari Kenya (KPA), Shirika la viwango la Kenya(KEBS) na mpango wa Chakula Duniani (WFP) kwa kuhakikisha kwamba chakula cha msaada kinafanikishwa”,alisema Betty.
Taarifa ya Mwahoka Mtsumi
Mbunge wa Nyali amepuzilia mbali madai ya kuhusishwa na siasa za ukabila
Wakimbizi nusu milioni wakabiliwa na baa la njaa, Dadaab
