News
Wakaazi wa Chumani wafunga barabara kuu ya Malindi-Mombasa
Wakaazi wa eneo la Chumani, Wadi ya Matsangoni Kaunti ya Kilifi, wameandamana kulalamikia kucheleweshwa kwa ujenzi wa barabara ya Malindi-Mombasa, wakidai kwamba barabara hiyo imekuwa hatari kwa usalama wa watumiaji wa barabara hiyo kutokana na kuongezeka kwa visa vya ajali hasa katika eneo hilo la Chumani.
Wakingozwa na Mwenyekiti wa Chama na waendeshaji Boda boda eneo la Chumani Eric Kenga, mamia ya wakaazi hao waliziba barabara katika kituo cha mabasi cha Chumani na kutatiza usafiri katika barabara hiyo ambayo kwa kawaida huwa yenye shughuli nyingi.
Maandamano hayo yanafanyika siku chache tu baada ya basi moja la shule lililokuwa likiwasafirisha wanafunzi kubingiria karibu na shule ya Upili ya Chumani.
Hakuna mwanafunzi aliyefariki wakati wa ajali hiyo ila majeruhiwa walipelekwa Hospitali kwa matibabu kabla ya kuruhusiwa kwenda nyumbani.
Waandamanaji hao walisema barabara hiyo imejaa mashimo na sasa wanaitaka serikali kupitia kwa Halmashauri ya barabara kuu nchini (KeNHA) iwajibike.
Mwakilishi wadi wa eneo la Matsangoni Hassan Mohammed ambaye pia alishiriki Maandamano hayo alisema atawaongoza wakaazi wa sehemu hiyo kuandamana na kufunga barabara hadi hali hiyo itakaporekebishika.
Taarifa ya Eric Ponda
Maafisa wa Polisi kaunti ya Mombasa wanachunguza tukio la wizi dhidi ya mtalii wa kigeni lililotokea katika eneo la Nyali
Kulingana na ripoti ya maafisa wa polisi, mtalii huyo mwenye umri wa miaka 51 ambaye ni raia wa Marekani, anadai kulaghaiwa na kisha kushambuliwa na kundi la wanaume aliyokutana nao muda mfupi kabla ya tukio.
Ripoti hiyo imeeleza kwamba mnamo mwezi Aprili 9 mwaka huu, raia huyo wa kigeni akiwa katika mkahawa mmoja eneo la Nyali jijini Mombasa, alikutana na mwanaume aliyejitambulisha kama Alex, ambaye alimshawishi kuelekea katika nyumba ya Airbnb iliyoko karibu na mkahawa huo.
Taarifa hiyo ilifafanua zaidi kwamba alipofika katika chumba hicho, alikumbana na wanaume wengine watano waliokuwa wakimsubiri ambapo mlango ulifungwa na kisha akashambuliwa na kulazimishwa kutoa pesa na vitu vya thamani.
Wahalifu hao walitoroka na mali mbalimbali ikiwemo simu ya rununu, kompyuta mpakato (laptop), fedha taslimu pamoja na fedha za kigeni na pia walifanikiwa kutoa pesa kutoka kwenye kadi zake za benki kwa njia ya udanganyifu.
Maafisa wa polisi kutoka Bamburi kwa kushirikiana na maafisa wa upelelezi wa DCI Nyali walifika eneo la tukio na kuanza uchunguzi, ingawa hadi sasa hakuna mtu aliyekamatwa wala mali iliyopatikana.
Kesi hiyo imewekwa chini ya uchunguzi zaidi huku juhudi zikiendelea kuwabaini na kuwakamata wahusika wa tukio hilo.
Taarifa ya Mwanahabari wetu
Idara ya usalama eneo la Likoni kaunti ya Mombasa imesema inachunguza kifo cha mwanamke mmoja aliyefariki katika mtaa wa senti kumi.
Mkuu wa polisi wa Likoni Joseph Mutungi alisema mwanamke huyo anadaiwa kupoteza maisha wakati wakiwa nyumbani kwa mwanamme anayesemekana kuwa mchumba wake.
Taarifa za awali ziliarifu kuwa marehemu alikuwa mgonjwa na anadaiwa alifika hospitalini kusaka matibabu japo hakupata huduma na kurejea nyumbani bila kutibiwa.
Inasemekana baadaye mchumba wake alioondoka kwenda kazini na kumwacha chini ya uangalizi wa mwanamke mwengine katika ploti hiyo.
Hali yake inadaiwa kuzorota na hatimaye kuaga dunia.
Maafisa wa usalama walisema wanaendelea na uchunguzi kubaini chanzo cha kifo hicho.
Mwili wa marehemu unahifadhiwa katika chumba cha kuhifadhi maiti katika hospitali ya Coast general kwa uchunguzi zaidi.
Taarifa ya Mwanahabari wetu
Polisi wanachunguza tukio la wizi dhidi ya raia wa kigeni
Polisi eneo la Likoni-Mombasa inachunguza kifo cha mwanamke
