News
Zaidi ya watalii 600 wamewasili katika bandari ya Mombasa
Zaidi ya watalii 600 wamewasili katika bandari ya Mombasa baada ya meli ya kifahari ya Azamara Onward kutia nanga katika bandari hiyo.
Meli hiyo iliyotokea bandari ya Victoria nchini Ushelisheli imebeba watalii 630 pamoja na wahudumu 389 kutoka mataifa mbalimbali, huku wengi wao wakitarajiwa kutembelea vivutio tofauti vya utalii katika eneo la Pwani.
Meli ya watalii zaidi ya laki sita ya Mv Azamara Onward imetia nanga katika Bandari ya Mombasa
Akizungumza wakati wa mapokezi hayo, Naibu Mwenyekiti wa kamati ya bunge la kitaifa kuhusu masuala ya wakenya wa Ughaibuni na wafanyakazi, Simon King’ara, amepongeza Wizara ya Utalii kwa juhudi za kuitangaza Kenya katika soko la kimataifa.
“Tumepokea watalii zaidi ya laki sita na tunashukuru hii ni ishara wazi kwamba sekta ya utalii inaendelea kuimarika na tayari watalii wengine wanatemebelea maeneo mbalimbali ya vivutio vya utalii kujinjari na kunapongeza serikali kwa kuhakikisha sekta hii inapigwa jeki vizuri”,alisema King’ara.
Watalii waliowasili nchini Kenya watumbuizwa na wasakata densi wa kitamaduni ya jamii ya Pwani.
Kwa upande wake, Mawakala wa meli hiyo wakiongozwa na Hashim Ahmed walisema kuongezeka kwa safari za watalii nchini Kenya ni ishara kuimarika kwa sekta hiyo pamoja na uchumi wa taifa.
“Tunaipongeza serikali, Wizara ya utalii na bandari kuhakikisha sekta hii inamarika zaidi na tunawaomba waweka mikakati bora” aliongeza Ahmed.
Meli hiyo itasalia katika bandari ya Mombasa kwa siku mbili kabla ya kuendelea na safari yake nchini Zanzibar.
Taarifa ya Mwanahabari wetu
Mbunge wa Nyali kaunti ya Mombasa Mohamed Ali amepuzilia mbali madai ya kuhusishwa na siasa za ukabila kwenye kaunti hiyo, akisema anafanya siasa zake bila kujali dini, kabila au hata eneo.
Akizungumza huko Nyali, Ali alisema kuna baadhi ya viongozi katika kaunti ya Mombasa, ambao wamekuwa wakiendekeza propaganda za kumhusisha na siasa za migawanyiko ili kumharibia jina taifa linapojiandaa kwa uchaguzi mkuu ujao wa 2027.
Ali ambaye alitangaza kuwania wadhifa wa ugavana kaunti ya Mombasa, aliwataka viongozi kufanya siasa zao kwa kunadi sera zao kwa wakaazi na maendeleo ambayo watatekeleza na sio kutumia suala la ukabila kuwachafulia wengine jina.
“2017 hakuna mtu aliniita mkabila, 2022 hakuna mtu aliniita mkabila, 2027 wanasema Mohamed Ali ni mkabila.Mimi Mohamed Ali, mimi nauliza nikisimama hapa juu ya gari, niseme kabila zote za Kenya wanaweza pewa nafasi ya ugavana ni kuna makosa?,basi sasa wanazunguka wakisema Mohamed ni mkabila kwasababu ameanza kufungua watu macho’’ alisema Ali.
Aidha, Ali alisema ataendelea kuzuru maeneo mbalimbali ya kauti ya Mombasa kunadi sera zake na kuwataka wakaazi wa kaunti hiyo kuwachagua viongozi wanaofaa ambao wataimarisha kaunti hiyo kimaendeleo.
‘’Mimi nimewaambia nitatembea hii Mombasa kwa uwezo wake mwenyezi mungu kutetea wananchi wa Mombasa’’ aliongeza Ali
Taarifa ya Janet Mumbi
Ripoti iliyotolewa hivi karibu na Shirika la Chakula duniani WFP ilionyesha kwamba zaidi ya wakimbizi nusu milioni wanaoishi katika kambi za wakimbizi za Kakuma na Dadaab zilizoko nchini Kenya, wako katika hatari ya kuangamia kutokana na baa la njaa.
Kambi hizi ambazo zinahifadhi wakimbizi wengi zaidi kutoka nchini Sudan Kusini, Jamhuri ya Kidemokrasia ya Kongo na Somalia, ziko hatari iwapo zitakosa misaada ya chakula.
Kufuatia hali hiyo ambayo pia imechangiwa na mashirika ya kimataifa kusitisha ufadhili, sasa hali huenda ikawa tofauti baada ya taifa la Korea kwa ushirikiano na Kenya kutoa ufadhili wa shehena ya nafaka ya zaidi ya tani elfu 10 ambayo inakadiriwa kuwa kima cha shilingi milioni 1.2.
Katibu katika Idara ya uhamiaji nchini Belio Kipsang, aliyepokea msaada huo wa Chakula mjini Mombasa na kuhifadhiwa katika maghala ya Shirika la WFP, ameonya kwamba iwapo Kenya itakosa kupokea msaada kutoka kwa washirika na wafadhili wengine, basi italazimika kuchukua maamuzi magumu, ikiwemo kuwaondoa baadhi ya wakimbizi.
“Nyuma ya kila takwimu kuna familia ambazo ustahimilivu wao unaendelea kujaribiwa kila siku: akina mama wanaokosa kula ili watoto wao wapate chakula, watu walio katika mazingira hatarishi wakiruka milo, na vijana wanaokabiliwa na mustakabali usio na uhakika. Hizi si takwimu za kufikirika. Zinawakilisha watu halisi ambao heshima yao, afya yao na matarajio yao ya maisha yanategemea maamuzi tunayofanya kwa pamoja,” alisema.
Wakati wa hafla hiyo ya kupokea msaada huo wa chakula kwa wakimbizi wa Kakuma na Dadaab, Mkurugenzi wa Shirika la WFP nchini Kenya Betty Ka, alisema shehena ya nafaka itasaidia kuwahudumia takribani wakimbizi nusu milioni katika miezi ijayo.
“Usafirishaji huu unaonyesha umuhimu wa ushirikiano imara katika mnyororo wa ugavi wa misaada ya kibinadamu, ambapo ushirikiano huu kati ya Kenya, Mamlaka ya bandari Kenya (KPA), Shirika la viwango la Kenya(KEBS) na mpango wa Chakula Duniani (WFP) kwa kuhakikisha kwamba chakula cha msaada kinafanikishwa”,alisema Betty.
Taarifa ya Mwahoka Mtsumi
Mbunge wa Nyali amepuzilia mbali madai ya kuhusishwa na siasa za ukabila
Wakimbizi nusu milioni wakabiliwa na baa la njaa, Dadaab
